Alþjóðlegi getnaðarvarnadagurinn
Alþjóðlegi getnaðarvarnadagurinn (World Contraception Day (WCD)) er alþjóðleg herferð sem miðar að því að skapa heim þar sem hver einasta þungun er velkomin. Markmiðið er að bæta vitund ungs fólks um getnaðarvarnir svo að það geti tekið upplýstar ákvarðanir um kynlíf og kynheilbrigði.
Á Íslandi eru það Fræðslusamtök um kynlíf og barneignir (FKB), Bayer Schering Pharma, FÍFK (Félag íslenskra fæðinga-og kvensjúkdómalækna) ásamt Ástráði sem nota daginn til að vekja athygli á þessu brýna málefni.
Yfirskrift herferðarinnar í ár er “Þitt líf, þín rödd: tölum um getnaðarvarnir”. Við viljum hvetja ungt folk til að ræða saman um getnaðarvarnir. Við viljum stuðla að því að ungt fólk hafi allar upplýsingar sem það þarf til að koma í veg fyrir ótímabæran getnað, þungun og kynsjúkdóma.
Skilaboð dagsins:
Ef þú ert að spá í að stunda kynlíf en veist ekki hvar þú færð góðar upplýsingar um getnaðarvarnir er gott ráð að tala við einhvern sem þú treystir (t.d. foreldra, vin eða heilbrigðisstarfsmann) sem gæti gefið þér ráð um það hvar er hægt að finna upplýsingarnar. Ekki vera feimin/n við að ræða málið við kærustuna eða kærastann áður en þið byrjið að stunda kynlíf. Mundu að það er ábyrgð ykkar beggja að spá í getnaðarvarnirnar.
Vefurinn www.your-life.com er mikilvægur hluti herferðarinnar. Þar er finna mikið af gagnlegum upplýsingum um ungt fólk og getnaðarvarnir.
Alþjóðlegi getnaðarvarnardagurinn er árviss viðburður sem nú á sér stað þann 26. september. Á hverju ári er dagurinn nýttur til að vekja athygli á málefnum sem varða getnaðarvarnir, bætt aðgengi að getnaðarvörnum og aukna þekkingu um kynlíf og kynheilbrigði.