Athugasemdir Icepharma hf. vegna innköllunar á fræðsluhefti Merck Sharp & Dome að kröfu Lyfjastofnunar
Lyfjastofnun hefur innkallað fræðsluhefti MSD „Góð ráð til að ná stjórn á sykursýki“. Í því sambandi vill Icepharma árétta að fræðsluheftið var af hálfu fyrirtækisins talið í fullu samræmi við lyfjalög nr. 93/1994 þar sem meðal annars kemur fram í 16. gr. að Handhöfum markaðsleyfa, eða umboðsmönnum þeirra, er heimilt að miðla til sjúklinga með bæklingum upplýsingum almenns eðlis um sjúkdóma og notkun tiltekinna lyfja.
Fræðsluheftið er þýðing á samskonar fræðsluhefti frá Danmörku og hafa engar athugasemdir borist við notkun þess þar í landi. Í fræðsluheftinu er vísað til meðferðarmarkmiða í blóðsykurstjórn frá DSAM (Dansk Selskab for Almen Medicin) sem setja HbA1c 6,1% sem ítrustu viðmið í dag. Þegar fræðsluheftið „Góð ráð til að ná stjórn á sykursýki“ var unnið og prentað á Íslandi höfðu nýjar klínískar leiðbeiningar um meðferðarmarkmið í blóðsykurstjórn ekki verið gefnar út af Landlæknisembættinu. Klínískar leiðbeiningar Landlæknis mæla ekki með HbA1c undir 6,5%.
Lyfjastofnun barst kvörtun um ofangreint fræðsluhefti þann 20. nóvember 2009. Tveimur mánuðum síðar eða þann 15. janúar 2010, var Icepharma upplýst um efni kvörtunarinnar og var þá dreifingu fræðsluheftisins hætt. Í kjölfar frekari samskipta við Lyfjastofnun var heftið innkallað, enda er það markmið Icepharma að fylgja lyfjalögum í hvívetna.