Fréttatilkynning frá MS félagi Íslands
Bókin, Benjamín, mamma mín og MS, eftir Stephanie Lazai með myndum Stephan Pohl, er nú komin út í íslenskri þýðingu Berglindar Ólafsdóttur. Lyfjafyrirtækið Bayer Schering Pharma gaf MS-félagi Íslands 1500 eintök af bókinni og kunnum við þeim bestu þakkir fyrir. Afhending bókarinnar fór fram á alþjóða MS-daginn 26. maí s.l.
Í bókinni um Benjamín er MS sjúkdómurinn útskýrður á einfaldan og aðgengilegan hátt með augum barns. Eins og fram kemur í formála, þá gefur bókin foreldrum og öðrum aðstandendum tækifæri til að lesa og ræða söguna og myndirnar deila reynslu sinni. Börnin fá tækifæri til að spyrja foreldra sína spurninga sem foreldrarnir geta svarað opinskátt og á heiðarlegan hátt. Eftir því hversu vel foreldrarnir geta tekist á við aðstæður og aðlagast, verður auðveldara fyrir börnin að aðlagast og flétta ástand foreldra sinna inn í sitt eigið líf. Bókin kemur með viðeigandi svör fyrir foreldra, umönnunaraðila, kennara, lækna og heilbrigðisstarfsfólk, við spurningum sem þau geta haft um áhrif langvinns fatlandi sjúkdóms, svo sem MS, á fjölskylduna og þá sérstaklega börnin.
MS er einn erfiðast taugasjúkdómurinn og greinist einkum hjá ungu fólki milli tvítugs og fertugs, það er á þeim aldri sem
foreldrar eiga lítil börn.
Um það bil 430 manns á Íslandi eru með MS – það er um 1,4 af hverjum 1000. Í dag er hægt að meðhöndla MS á virkan hátt með bæði lyfjum og sjúkraþjálfun og sjúkdómurinn þarf ekki sjálfkrafa að hafa það í för með sér að fólk þurfi að nota hjólastól.
Bókinni verður dreift án endurgjalds til allra félagsmanna í MS-félaginu og verður einnig send bókasöfnum og sjúkrastofnunum. Víða í þjóðfélaginu er fólk sem tengist sjúkdómnum multiple sclerosis (MS) á einhvern hátt. Þeir eru ýmist með sjúkdóminn sjálfir eða eru foreldrar, börn, afar, ömmur, frænkur eða frændur einhvers með MS eða þekkja einhvern með MS. Fræðsla og umræður eru alltaf af hinu góða og efla vitund almennings um sjúkdóminn.
Áhugafólk um sjúkdóminn getur nálgast eintak af bókinni á skrifstofu MS-félags Íslands að Sléttuvegi 5 í Reykjavík. Nánari upplýsingar um sjúkdóminn og félagið má finna á www.msfelag.is
-------
Eintak af bókinni fylgir hér með til upplýsingar.
Hægt er að fá sendar eftirfarandi myndir:
• Mynd af forsíðu bókarinnar
• Mynd frá afhendingu bókarinnar.
--------
Nánari upplýsingar gefur
Berglind Ólafsdóttir,
Framkvæmdastjóri MS-félags Íslands
berglind.olafsdottir@msfelag.is
Sími 568 8620