Einstakt framtak sjúklings
Meðfylgjandi grein birtist í Morgunblaðinu þriðjudaginn 6.júlí. Öndunarvélin sem Þorbjörg safnaði er frá fyrirtækinu Philips Repironics sem Icepharma er umboðsaðili fyrir. Sölu- og markaðsstjóri er Kristín Sædal á Heilbrigðissviði.
Safnaði fyrir öndunarvél upp á eigin spýtur og gaf
Svefnstaður Þorbjörg Elín Friðriksdóttir glímir við lungnateppu og er hjartveik. Hún hefur síðustu átta mánuði þurft að sofa um nætur í öndunarvélinni. Hún segir það kraftaverk hversu söfnunin tók skamman tíma. Silja Björk Huldudóttir silja@mbl.is „Hún er náttúrlega ótrúlega kraftmikil og dugleg að hafa safnað fyrir þessu úr eigin sjúkrarúmi.
„Hún er náttúrlega ótrúlega kraftmikil og dugleg að hafa safnað fyrir þessu úr eigin sjúkrarúmi. Þetta er einstakt framtak, sem skiptir stofnunina miklu máli,“ segir Bryndís Sævarsdóttir, hjúkrunardeildarstjóri á hand- og lyflækningadeild á Heilbrigðisstofnun Suðurnesja. Vísar hún þar til Þorbjargar Elínar Friðriksdóttur sem í dag kl. 13.00 afhendir stofnuninni gjöf að verðmæti rúmlega 2,6 milljónir króna, en af því tilefni verður boðið til kaffisamsætis á stofnuninni. Um er að ræða BiPAP-Vision ytri öndunarvél sem kostar 2,1 milljón, en slíka vél er hægt að nota án þess að þurfa að halda fólki sofandi, vökvadælu sem kostar 400 þúsund og nýtist til þess að gefa bæði vökva og lyf í æð auk tveggja hjólastóla.
Sýnir mikinn rausnarskap
„Á sjúkrahúsi eins og okkar, sem er fjársvelt, viðhöldum við okkar tækjabúnaði með gjöfum. En við fáum ekki svona stórar gjafir á hverjum degi,“ segir Bryndís og tekur fram að oftast sé leitað til félagasamtaka sem aðstoði við fjársöfnun til tækjakaupa. „Auk þess sem einn maður hefur verið mjög duglegur á síðustu þremur árum við að safna fjármunum til tækjakaupa,“ segir Bryndís og tekur fram að það sé alltaf merkilegt þegar fólk taki sig til og sýni svona mikinn rausnarskap, enda ekkert sjálfgefið að fólk leggi svona mikla vinnu á sig í góðgerðarskyni.
Vélin kemur í góðar þarfir
Aðspurð segir Bryndís tækin sem gefin verða í dag koma í góðar þarfir, ekki síst öndunarvélin. „Fyrir eigum við eina svona öndunarvél og hún er í stöðugri notkun fyrir fólk með alvarlega lungnasjúkdóma,“ segir Bryndís og tekur fram að það geti skipt fólk með alvarlega lungnasjúkdóma sköpum að komast í svona vél þó ekki sé nema í nokkra klukkutíma til að komast yfir erfiðan hjalla.
„Við höfum lent í því að þurfa að hoppa með þessa einu vél okkar á milli sjúklinganna sem eru í mestu þörfinni og höfum þurft að taka fólk úr vélinni til að setja aðra veikari sjúklinga í hana, sem er náttúrlega ömurleg aðstaða,“ segir Bryndís og tekur fram að tvisvar hafi verið hægt að fá vél lánaða hjá Landspítalanum auk þess sem senda hafi þurft sjúklinga til Reykjavíkur, en slíkt geti tekið mjög á veika sjúklinga. „Með tilkomu nýju vélarinnar getum við betur þjónað fólkinu okkar hérna heima,“ segir Bryndís.
KRAFTAVERK AÐ SAFNA FYRIR VÉL Á EKKI LENGRI TÍMA
„Allir tóku vel í beiðnina“
„Mér finnst það kraftaverk að tekist hafi að safna fyrir öndunarvélinni á ekki lengri tíma,“ segir Þorbjörg Elín Friðriksdóttir. Hugmyndina að söfnuninni fékk hún um miðjan febrúar sl. þegar hún mætti á spítalann, þar sem hún hefur síðustu átta mánuði sofið í einu öndunarvélinni sem þar var til, og komst þá að því að vélin væri upptekin. „Ég fékk auðvitað algjört sjokk enda get ég ekki án vélarinnar verið,“ segir Þorbjörg sem glímir við lungnateppu og er hjartveik. Að sögn Þorbjargar spurðist söfnun hennar vel út, m.a. með umfjöllun í Víkurfréttum og á Facebook auk þess sem hún sendi nokkrum félagasamtökum bónarbréf. „Allir tóku mjög vel í þetta, sem sýnir að Íslendingar standa saman þegar á þarf að halda,“ segir Þorbjörg og tekur fram að Sjálfsbjörg á Suðurnesjum hafi gefið rausnarlega
Frétt úr greinasafni mbl
Silja Björk Huldudóttir
silja@mbl.is