Fyrsta myndsímtalið í gegnum lyfjaskammtara á Íslandi

Fyrsta myndsímtalið í gegnum Evondos Anna lyfjaskammtara á Íslandi

Heimahjúkrun á Akureyri hefur markað tímamót í íslenskri heimahjúkrun þann 29. maí 2026 með því að verða fyrsta stofnun landsins til að nýta myndsímtalalausnina Evondos Anna í gegnum lyfjaskammtara.

Með innleiðingu Evondos Anna lyfjaskammtarans verður lyfjagjöf í heimahúsum ekki aðeins öruggari og markvissari heldur skapast einnig nýir möguleikar til mannlegra samskipta með öruggum myndsímtölum þegar þörf krefur. Lausnin styður við betri meðferðarheldni, eykur öryggi notenda og gerir starfsfólki kleift að fylgja betur eftir, veita leiðbeiningar og bregðast við aðstæðum án þess að einstaklingurinn þurfi að yfirgefa heimili sitt.

Fyrsta myndsímtalið í gegnum lyfjaskammtara fór fram á dögunum og sá Eva Magnúsdóttir, hjúkrunarfræðingur hjá Heimahjúkrun HSN, um símtalið. Samtalið stóð yfir í 8 mínútur og 37 sekúndur og allt gekk samkvæmt áætlun.

Innleiðing tækninnar er liður í að styrkja og efla þjónustu heimahjúkrunar. Markmiðið er ekki að tæknin komi í stað mannlegrar umönnunar heldur að hún styðji við hana og auki möguleika starfsfólks til að veita örugga, sveigjanlega og persónulega þjónustu, ásamt því að styðja enn betur við starfsfólk heimahjúkrunar sem getur nú sinnt enn fleiri skjólstæðingum með þessari nýjung.

Heimahjúkrun á Akureyri er þar með brautryðjandi á Íslandi í notkun þessarar lausnar og mun reynsla þeirra nýtast við frekari þróun og uppbyggingu stafrænnar heilbrigðisþjónustu um land allt.

< Eldri færslur